न्हावरेत बिनविरोध धमाका! उपसरपंचपदी सुभाष कोकडे यांची एकमताने निवड!

न्हावरे, (सुधीर खोमणे, प्रतिनिधी) : शिरूर तालुक्यात राजकीय घडामोडींनी वेग घेतला असताना, न्हावरे (ता. शिरूर) येथील ग्रामपंचायतीत मात्र आज एका महत्त्वाच्या पदाची बिनविरोध निवड होऊन नवा पायंडा पाडला गेला. ग्रामपंचायतीच्या उपसरपंचपदी सुभाष रावसाहेब कोकडे यांची आज (दि. ७) बिनविरोध निवड करण्यात आली आहे, ज्यामुळे कार्यकर्ते आणि ग्रामस्थांमध्ये मोठा जल्लोष पाहायला मिळाला.

उपसरपंच विजया भोंडवे यांचा राजीनामा

विशेष म्हणजे, विद्यमान उपसरपंच विजया भोंडवे यांनी दुसऱ्या सदस्याला उपसरपंच होण्याची संधी मिळावी, या उदात्त हेतूने आपल्या पदाचा राजीनामा दिला होता. त्यामुळे रिक्त झालेल्या या महत्त्वाच्या पदासाठी आज (दि. ७) ग्रामपंचायत कार्यालयात सरपंच कमल कोकडे यांच्या अध्यक्षतेखाली निवडणूक प्रक्रिया पार पडली.

एकमताने निवड, कार्यकर्त्यांचा जल्लोष

यावेळी झालेल्या ग्रामपंचायत सदस्यांच्या बैठकीत, उपसरपंचपदासाठी सुभाष कोकडे यांच्या नावावर सर्व सदस्यांनी एकमताने शिक्कामोर्तब केले. त्यानंतर सुभाष कोकडे यांनी एकमेव उमेदवारी अर्ज दाखल केल्यामुळे, त्यांची उपसरपंचपदी बिनविरोध निवड झाल्याचे निवडणूक सहाय्यक व ग्रामपंचायत अधिकारी लहू जगदाळे यांनी जाहीर केले.

या निवडीनंतर मान्यवर आणि ग्रामपंचायत सदस्यांच्या वतीने सुभाष कोकडे यांचा सत्कार करण्यात आला. यावेळी कार्यकर्त्यांनी गुलालाची उधळण करत आणि घोषणा देत मोठा जल्लोष साजरा केला. न्हावरे ग्रामपंचायतीमधील ही बिनविरोध निवड लोकशाहीतील एक चांगला पायंडा म्हणून पाहिली जात आहे.