पुणे ग्रामीण पोलिसांची 'लेडी गँग'ला अटक; बसमधील सोन्याच्या चोरीचा पर्दाफाश

शिरुर, (सुधीर खोमणे, प्रतिनिधी) : पुणे ग्रामीण स्थानिक गुन्हे शाखेने आणि शिरूर पोलिसांनी मिळून एका महिलेच्या पर्समधून सोन्याचे दागिने चोरणाऱ्या दोन महिला चोरट्यांना अटक केली आहे. शिरूर बसस्थानकातून ही चोरी झाली होती. चोरलेल्या दागिन्यांची अंदाजे किंमत ४,६८,००० रुपये आहे.

काय आहे घटना?

११ मे २०२५ रोजी दुपारी १२ वाजताच्या सुमारास, रुपाली अनिल काळे या त्यांच्या मुली आणि भाचीसोबत बारामतीला जाण्यासाठी शिरूर बसस्थानकात बसमध्ये चढत होत्या. त्याचवेळी एका अज्ञात चोरट्याने त्यांच्या पर्समधून ६.५ तोळे वजनाचे सोन्याचे गंठण (ज्याची किंमत ३,९०,००० रुपये आहे) आणि १.३ तोळे वजनाचे सोन्याचे कानातले झुबे (ज्याची किंमत ७८,००० रुपये आहे) असे एकूण ४,६८,००० रुपयांचे दागिने चोरले. या घटनेनंतर शिरूर पोलीस स्टेशनमध्ये गुन्हा दाखल करण्यात आला.

पोलिसांनी कसा तपास केला?

गुन्ह्याचे गांभीर्य लक्षात घेऊन, पुणे ग्रामीण स्थानिक गुन्हे शाखेचे वरिष्ठ पोलीस निरीक्षक अविनाश शिळीमकर आणि शिरूर पोलीस स्टेशनचे पोलीस निरीक्षक संदेश केंजळे यांनी तात्काळ तपास पथके तयार केली. या पथकांमध्ये अनेक अधिकारी आणि कर्मचारी होते.

या पथकाने शिरूर तालुका तसेच अहमदनगर जिल्ह्यातील श्रीरामपूर तालुक्यात १०० हून अधिक सीसीटीव्ही फुटेज तपासले. तांत्रिक विश्लेषणाच्या आधारे कसून शोध घेतल्यानंतर हा गुन्हा उघडकीस आला.

आरोपींना अटक आणि मुद्देमाल जप्त:

तपासादरम्यान, मनीषा विजय कसबे आणि शोभा शंकर दामोदर (दोघी रा. संजयनगर, श्रीरामपूर, जि. अहमदनगर) या दोन महिलांनी हा गुन्हा केल्याचे समोर आले. पोलिसांनी श्रीरामपूर येथे जाऊन या दोन्ही महिलांना ताब्यात घेतले. प्राथमिक चौकशीत त्यांनी चोरी केल्याची कबुली दिली. त्यांच्याकडून चोरीला गेलेले सोन्याचे गंठण आणि कानातले झुबे, असे एकूण ४,६८,००० रुपयांचे दागिने जप्त करण्यात आले आहेत.

ही कारवाई पुणे ग्रामीण पोलीस अधीक्षक संदीप गिल, अप्पर पोलीस अधीक्षक रमेश चोपडे व शिरूरचे उपविभागीय अधिकारी प्रशांत ढोले यांच्या मार्गदर्शनाखाली पार पडली.

आरोपींना पकडण्यासाठी शिरूर पोलीस स्टेशनचे पोलीस उपनिरीक्षक शुभम चव्हाण, पोलीस हेड कॉन्स्टेबल तुषार पंधारे, जनार्दन शेळके, संजय जाधव, राजू मोमीन तसेच दिलीप पवार, महिला पोलीस भाग्यश्री जाधव, मोनिका वाघमारे, नाथसाहेब जगताप, नितेश थोरात, विजय शिंदे, अजय पाटील, रविंद्र आव्हाड, सचिन भोई, निखिल रावडे, नीरज पिसाळ इत्यादी पोलीस अधिकारी व कर्मचाऱ्यांनी कारवाईमध्ये महत्त्वाची भूमिका बजावली.