तनिषा भिसे यांना न्याय मिळावा यासाठी शिरूर पोलिसांना निवेदन

शिरूर,(सुधीर खोमणे, प्रतिनिधी) : पुणे येथील दीनानाथ मंगेशकर धर्मादाय रुग्णालयात उपचाराअभावी तनिषा सुशांत भिसे यांचा मृत्यू झाल्याच्या घटनेमुळे संतप्त प्रतिक्रिया उमटत आहेत. या पार्श्वभूमीवर, शिरूर येथे शनिवारी सकल मातंग समाज महाराष्ट्र, अखिल मातंग समाज चळवळ महाराष्ट्र, भीम छावा संघटना, मातंग एकता आंदोलन व लहूजी शक्ती सेनेच्या वतीने शिरूर पोलिसांना निवेदन देण्यात आले. रुग्णालयाच्या मुजोर प्रशासनावर कठोर कारवाई करण्याची मागणी निवेदनात करण्यात आली असून, अन्यथा राज्यभर आंदोलन छेडण्याचा इशारा देण्यात आला आहे.

तनिषा भिसे यांच्या नातेवाईकांनी दिलेल्या माहितीनुसार, रुग्णालयाने प्रसूतीसाठी तब्बल दहा लाख रुपये अनामत रक्कम मागितली. ती नसल्याने अडीच लाख रुपये देण्याची तयारी दर्शवली, परंतु रुग्णालय प्रशासनाने ते मान्य केले नाही. त्यामुळे तनिषा यांना दुसऱ्या रुग्णालयात जावे लागले. वाटेतच त्यांची प्रसूती झाली आणि त्यांनी दोन जुळ्या बाळांना जन्म दिला. मात्र दुर्दैवाने त्यांचा मृत्यू झाला. तनिषा यांचे पती सुशांत भिसे हे विधान परिषद आमदार अमित गोरखे यांचे स्वीय सहाय्यक असल्याने त्यांनी मुख्यमंत्री सहाय्यता कक्षाच्या माध्यमातून प्रयत्न केले, परंतु रुग्णालयाने सहकार्य केले नाही, असे नातेवाईकांनी सांगितले.

या घटनेच्या निषेधार्थ मातंग एकता आंदोलनाचे शिरूर अध्यक्ष सतीश बागवे व बाळासाहेब पाटोळे, भीम आर्मीचे तालुकाध्यक्ष चेतन साठे व शिरूर अध्यक्ष अविनाश शिंदे, अखिल मातंग समाज चळवळीचे संतोष साळवे, सकल मातंग समाज चळवळीचे बाळासाहेब जाधव व रवींद्र खुडे, लहूजी शक्ती सेनेचे शहराध्यक्ष सोनूभाऊ काळोखे यांच्यासह कार्यकर्ते मोठ्या संख्येने उपस्थित होते. त्यांनी रुग्णालय प्रशासनाच्या भूमिकेचा तीव्र निषेध केला आणि तातडीने कारवाई करण्याची मागणी केली.