'आरटीई’ प्रवेशासाठी २७ जानेवारीपर्यंत ऑनलाईन अर्ज भरता येणार

 

 न्हावरे, (सुधीर खोमणे, प्रतिनिधी) : पालकांसाठी महत्त्वाची बातमी समोर आली आहे. 'आरटीई’ अंतर्गत २५ टक्के जागांवरील प्रवेश प्रक्रियेसाठी १४ जानेवारीपासून ऑनलाइन अर्ज भरण्याची प्रक्रिया सुरू झाली आहे. पालकांना २७ जानेवारीपर्यंत ऑनलाइन अर्ज करता येणार आहे. बालकांचा मोफत व सक्तीच्या शिक्षणाचा अधिकार (आरटीई) कायद्या अंतर्गत वंचित, दुर्बल व सामाजिक व शैक्षणिकदृष्ट्या मागासवर्ग घटकातील मुलांना खासगी विनाअनुदानित शाळांमध्ये प्रवेश स्तरावर २५ टक्के जागांवर मोफत प्रवेश दिले जातात.

यातील २५ टक्के विद्यार्थ्यांचे शैक्षणिक शुल्क शासनाकडून संबंधित शाळांना अदा केले जाते. मागील वर्षी प्रवेश प्रक्रियेत बदल केले होते. त्यानंतर पालकांनी न्यायालयात दाद मागितली. न्यायालयाच्या आदेशानंतर प्रक्रिया पुन्हा नव्याने सुरू करण्यात आली आहे. २०२५-२६ शैक्षणिक वर्षातील प्रवेश प्रक्रिया १८ डिसेंबरपासून सुरु झाली आहे. ७ जानेवारीपर्यंत शाळांना नोंदणीसाठी मुदत देण्यात आली होती. २७ जानेवारीपर्यंत अर्ज करण्यासाठी मुदत आहे. मागील वर्षीच्या प्रक्रियेला लागलेला विलंब लक्षात घेत यंदा प्रवेश प्रक्रिया लवकर सुरु होत आहे. 

इयत्ता पहिली किंवा पूर्व प्राथमिक वर्ग स्तरावर २५ टक्के प्रवेश प्रक्रियेकरिता पालकांनी https://student.maharashtra.gov.in/adm_portal या वेबसाइट जाऊन अर्ज भरण्याची प्रक्रिया करावी लागणार आहे. प्रवेश प्रक्रियेकरीता विचारपूर्वक १० शाळांची निवड करण्यात यावी. पालकांनी निवासस्थानाचे लोकेशन अचूक नमूद करावे. प्रक्रियेबाबत समस्या असल्यास मदत केंद्राशी संपर्क साधावा. ज्या बालकांनी यापूर्वी आरटीई अंतर्गत प्रवेश घेतला असल्यास सदर बालकाला पुन्हा अर्ज करता येणार नाही. कागदपत्रे ऑनलाइन अपलोड करु नयेत. यासह निवासी, जन्म तारीखसह विविध घटकांमधील विद्यार्थ्यांसाठी आवश्यक कागदपत्रे, कागदपत्रे तपासणी करण्यासाठी समितीची रचनाही शिक्षण संचालनालयाने स्पष्ट केली आहे.